Caritas Austrália debate apoiu ba Timor-Leste ho Primeiru Ministru

DÍLI

- 29 Setembru 2026

- 12:40 PM

Imagem da matéria: Caritas Austrália debate apoiu ba Timor-Leste ho Primeiru Ministru · Imagem: Foto: Media PM

Foto: Media PM

DÍLI, 29 Setembru 2026 (TATOLI) — Diretora Ezekutiva Caritas Austrália, Kirsten Sayers, hamutuk ho delegasaun, hala'o enkontru kortézia ho Primeiru-Ministru Kay Rala Xanana Gusmão hodi diskute apoiu ne'ebe organizasaun ne'e kompromete atu ajuda Governu Timor-Leste iha área violénsia bazeia ba jéneru, reziliénsia, resposta umanitária no mudansa klimátika.

Durante enkontru, parte rua ko'alia kona-ba projetu balun ne'ebe Caritas hala'o iha Timor-Leste.

Kirsten Sayers hateten katak Caritas Austrália servisu hamutuk ho povu Timor-Leste dezde tinan 1990. Tanba ne'e, Caritas Austrália konsidera importante atu kontinua akompaña komunidade no komprende diretamente situasaun ne'ebe komunidade sira enfrenta, hodi bele fó apoiu iha área sira ne'ebe relevante ba dezenvolvimentu no bem-estar komunidade.

Nia dehan Caritas Australia hamutuk ho komunidade Timor-Leste ultrapasa ona dezafiu sira iha tempu pasadu, no agora haree ba oin atu enfrenta no responde ba área sira ne'ebe importante ba futuru.

Sayers dehan Caritas Australia mós hakarak servisu hamutuk ho Igreja, juventude feto sira no membru hotu-hotu husi sosiedade atu apoia no akompaña Timor-Leste.

Diretora ne'e hatutan katak sira iha esperansa ba futuru entre Timor-Leste, liuliu atu bele servisu besik tebes ho Bispu sira iha Timor-Leste hodi hasa'e no hametin Caritas Timor-Leste.

"Ami servisu hamutuk ho Padre sira no ema sira iha Caritas Timor-Leste atu haforsa sira, hamri'ik hamutuk ho sira, no apoia Timor-Leste iha nia dalan ba futuru", tenik nia.

Nune'e mós tuir Bispu Maitland-Newcastle no Bispu Delegadu ba Caritas, Michael Kennedy, ne'ebé hola parte mós iha delagasaun ne'e sente haksolok tebes atu hamutuk servi no fo tulun ba komunidade Tiomoroan.